გამოყენებითი ფსიქოლოგია

საგანმანათლებლო პროგრამის სახელწოდება: გამოყენებითი ფსიქოლოგია

მისანიჭებელი კვალიფიკაცია: ფსიქოლოგიის მაგისტრი/Master in Applied Psychology

პროგრამის მოცულობა კრედიტებით: 120 კრედიტი

სწავლების ენა: ქართული

უმაღლესი აკადემიური განათლების საფეხური: მაგისტრატურა

საგანმანათლებლო პროგრამის ტიპი: აკადემიური

ვის ვამზადებთ: გამოყენებითი ფსიქოლოგიის  სამაგისტრო პროგრამა ამზადებს სპეციალისტებს მართვის/ორგანიზაციული და პოლიტიკური ფსიქოლოგიის მიმართულებებით (პროგრამის/კურიკულუმის და სასწავლო კურსების შესახებ დაწვრილებით იხ. ქვემოთ).

ორივე მიმართულების კურსდამთავრებულები აღჭურვილნი არიან როგორც სისტემური და ღრმა თეორიული ცოდნით არჩეულ სპეციალობაში, ისე შესაბამისი პრაქტიკული  უნარ-ჩვევებით; ასევე - კვლევის  დაგეგმვისა და განხორციელებისათვის აუცილებელი ცოდნითა და პრაქტიკული გამოცდილებით, ანალიტიკური ხედვით და ეფექტური სტრატეგიების შემუშავების უნარებით.

აკადემიური პროცესი: პროგრამა და მთლიანად აკადემიური პროცესი სტუდენტებს არჩეულ სფეროში ეფექტური პროფესიული მუშაობისთვის ამზადებს.

სასწავლო კომპონენტებს  უძღვება უნივერსიტეტის აკადემიური პერსონალი, აგრეთვე სათანადო გამოცდილებისა და კომპეტენციების მქონე მოწვეული სპეციალისტები.

საგნობრივი ცოდნისა  და აკადემიური წერის უნარის განმტკიცებას ემსახურება წერითი დავალებები, რომელიც კურსის განმავლობაში სხვადასხვა ფორმით მიეწოდება მაგისტრანტს: ქვიზი, ღია და დახურულ კითხვებზე პასუხი, ანალიტიკური რეფერატები, მიკრო- და საბოლოო კვლევითი პროექტები. 

ლექცია/სემინარებზე თეორიულ მასალასთან ერთად ხდება პრაქტიკული მაგალითებისა და “ქეისების” განხილვა, რომელთა ნაწილი ლექტორებისა და სპეციალურად მოწვეული ექსპერტების, დარგის წამყვანი სპეციალისტების, საკუთარ გამოცდილებას ემყარება.

განსაკუთრებული ყურადღება ექცევა მაგისტრანტების აქტიურ ჩართულობას სწავლა/სწავლების პროცესში - პრეზენტაციების, დისკუსიის, დებატების, როლური თამაშებისა და სიმულაციების სახით, რაც, ამავე დროს, კომუნიკაციისა და გუნდური მუშაობის უნარ-ჩვევების გამომუშავებას უწყობს ხელს.

თანამედროვე მოთხოვნების შესაბამისად, მაგისტრანტებს ვთავაზობთ სპეცკურსს ფსიქოლოგიურ კვლევებში ხელოვნური ინტელექტის გამოყენების შესახებ.

დასაქმების სფერო:  ჩვენი კურსდამთავრებულების შესაძლო დასაქმების სფერო მოიცავს (თუმცა არ შემოიფარგლება) კვლევით, ანალიტიკურ, საექსპერტო, საკონსულტაციო ან/და მენეჯერულ პოზიციებს - როგორც საჯარო, ისე კერძო სექტორებში და ასევე საერთაშორისო ორგანიზაციებში, ყველგან - სადაც არის მოთხოვნა მართვის/ორგანიზაციის ან პოლიტიკური ფსიქოლოგიის კომპეტენციებზე.

სურვილის შემთხვევაში, კურსდამთავრებულებს ასევე შეუძლიათ გაყვნენ სამეცნიერო კარიერას  და გააგრძელონ სწავლა მომდევნო საფეხურზე.

პროგრამაზე დაშვების წინაპირობა:  პროგრამაზე დაშვების აუცილებელ წინაპირობას წარმოადგენს:

• ფსიქოლოგიის ბაკალავრის ან სოციალურ მეცნიერებათა, მათ შორის - სოციოლოგიის ან პოლიტიკის მეცნიერებათა, ბაკალავრის (ან მასთან  გათანაბრებული) აკადემიური  ხარისხი;
• საერთო სამაგისტრო გამოცდების ჩაბარება;
• შიდა საუნივერსიტეტო პროცედურის გავლა.

იხილეთ კურიკულუმი

იხილეთ საგნების მოკლე აღწერა