საჯარო მმართველობის სადოქტორო პროგრამა

საჯარო მმართველობის სადოქტორო პროგრამის მიზანია ხელი შეუწყოს აღნიშნული დარგის განვითარებას, შექმნას ახალი ცოდნა, გააუმჯობესოს კვლევის ხარისხი. პროგრამა ამზადებს დამოუკიდებელ, მაღალკვალიფიციურ მკვლევრებს და აკადემიურ კადრებს უმაღლესი სასწავლო დაწესებულებებისთვის, ანალიტიკური კვლევითი ცენტრებისთვის, საჯარო სექტორისთვის და სხვა დაინტერესებული ორგანიზაციებისთვის. საჯარო მმართველობის დოქტორს აქვს დარგის მაღალკვალიფიციური ცოდნა და შეუძლია მნიშვნელოვანი წვლილი შეიტანოს საჯარო მმართველობის სფეროს განვითარებაში ახალი ცოდნის გენერირების, გავრცელებისა და კომერციალიზაციის გზით. აქედან გამომდინარე, საჯარო მმართველობის სადოქტორო პროგრამა უზრუნველყოფს:

-     საჯარო მმართველობის სფეროში ახალი ცოდნის გენერირებას;

-     საჯარო მმართველობის სფეროში მაღალკვალიფიციური მკვლევრების მომზადებას;

-     საჯარო მმართველობის სფეროში კვალიფიციური აკადემიური კადრების მომზადებას;

- საჯარო მმართველობის სფეროში სამეცნიერო პროდუქციის კომერციალიზაციის განვითარებას.

საჯარო მმართველობის სადოქტორო პროგრამაზე სწავლის უფლება აქვს მაგისტრის, ან მასთან გათანაბრებული აკადემიური ხარისხის მქონე პირს, ვისაც მიღებული აქვს მაგისტრის ხარისხი საჯარო მმართველობის ან მომიჯნავე დარგებში. გამონაკლისი დაიშვება სადისერტაციო საბჭოს გადაწყვეტილებით, კვლევის გამოცდილებისა და შესაბამისი კვალიფიკაციის შეფასების საფუძველზე.

პროგრამის შესაძლო საკვლევი თემატიკა შეგიძლიათ იხილოთ ბმულის სახით. 

საჯარო მმართველობის სადოქტორო პროგრამით გათვალისწინებულ სასწავლო კომპონენტში გამოყენებული ძირითადი სწავლება-სწავლის მეთოდები უზრუნველყოფს სასწავლო კურსის სილაბუსით გათვალისწინებული სწავლის შედეგების მიღწევას, ხოლო არსებული სწავლების მეთოდების ერთობლიობა - პროგრამით გათვალისწინებული სწავლის შედეგების მიღწევას. სასწავლო კურსის სილაბუსით გათვალისწინებული სწავლება-სწავლის მეთოდები ხელს უწყობს კონკრეტული მასალის ათვისებას და ავითარებს სტუდენტის ტრანსფერულ უნარებს.

საჯარო მმართველობის სადოქტორო პროგრამის განხორციელება უზრუნველყოფილია შესაბამისი ადამიანური რესურსით. საგანმანათლებლო პროგრამით გათვალისწინებულ სასწავლო კომპონენტებს უძღვება როგორც უნივერსიტეტის აკადემიური პერსონალი, აგრეთვე სათანადო გამოცდილებისა და კომპეტენციების მქონე მოწვეული სპეციალისტები. ადამიანური რესურსის შესახებ დამატებითი ინფორმაცია იხილეთ დანართში.

პროგრამის აკადემიური პროცესის მიღმა უნივერსიტეტი დოქტორანტებს კვლევების დეპარტამენტის საშუალებით სხვადასხვა ტიპის მხარდაჭერას სთავაზობს.  მათ შეუძლიათ მონაწილეობა მიიღონ მცირე, შიდასაუნივერსიტეტო საგრანტო კონკურსში და აკადემიურ პერსონალთან ერთად განახორციელონ კვლევითი პროექტი. 

უნივერსიტეტის კვლევების დეპარტამენტი ასევე უზრუნველყოფს კვლევასთან დაკავშირებული სხვადასხვა აქტივობებისთვის დაფინანსების გამოყოფას, მაგალითად პროსპექტუსის წამატებით დაცვის შემდეგ დოქტორანტებს ექნებათ შესაძლებლობა კონკურსის საფუძველზე მოიპოვონ საუნივერსიტეტო სადოქტორო სტიპენდია საკუთარი სადისერტაციო ნაშრომის ემპირიული კვლევის განსახორციელებლად საჭირო ფინანსური ხარჯების დასაფარად. 

თანამშრომლებს, რომლებიც სადოქტორო კვლევის ბოლო ეტაპზე იმყოფებიან, ჯიპა - საქართველოს საზოგადოებრივ საქმეთა ინსტიტუტი  დისერტაციის დასასრულებლად სთავაზობს სამეცნიერო შვებულებას. უნივერსიტეტი ასევე უზრუნველყოფს სწავლის ღირებულების 75% დაფინანსებას თანამშრომლებისთვის.

დოქტორანტების პროფილები დაემატება ევროკავშირის მიერ დაფინანსებულ, ERASMUS + KA2 პროგრამის პროექტის - ,,საქართველოს უმაღლეს საგანმანათლებლო დაწესებულებებში სამეცნიერო კვლევების განვითარების ხელშეწყობა” (Raising Research Capacity of Georgian HEIs through Developing R&D Units – HERD - https://herd.tsu.ge/) ფარგლებში შექმნილ სამეცნიერო პორტალს. 

სადოქტორო პროგრამის სტუდენტებზე გავრცელდება  უნივერსიტეტში მოქმედი ინტერნაციონალიზაციის მექანიზმები და სამეცნიერო კონფერენციებში მონაწილეობის მხარდამჭერი ინსტრუმენტები. 

უნივერსიტეტის კვლევების დეპარტამენტი ასევე სთავაზობს დოქტორანტ სტუდენტებს სამეცნიერო საგრანტო პროექტების შესახებ ინფორმაციას და კონსულტირების შესაძლებლობას სამეცნიერო პროექტების მოპოვებისა და მართვის მიმართულებით. 

საჯარო მმართველობის სადოქტორო პროგრამით გათვალისწინებული სწავლის შედეგების მისაღწევად გამოიყენება სტუდენტებისთვის შეზღუდვების გარეშე ხელმისაწვდომი უნივერსიტეტის ინფრასტრუქტურა და მატერიალურ-ტექნიკური რესურსი.

საჯარო მმართველობის სადოქტორო პროგრამის კურსდამთავრებულს შეუძლია დაიკავოს მკვლევრის/ანალიტიკოსის პოზიცია კვლევით ინსტიტუტებში, კერძო და სხვა ორგანიზაციებში, ან/და აკადემიური თანამდებობა უმაღლეს საგანმანათლებლო დაწესებულებებში.

საჯარო მმართველობის სადოქტორო პროგრამის სასწავლო გეგმა. 

სოციალურ მეცნიერებათა სკოლის სადისერტაციო საბჭოსა და დოქტორანტურის დებულება

სოციალურ მეცნიერებათა სკოლის სადისერტაციო საბჭო