GIPA განახლებული საერთაშორისო სტანდარტებით ავტორიზებულ უნივერსიტეტთა ხუთეულშია

საქართველოში დანერგილ ახალ საერთაშორისო სტანდარტებთან შესაბამისობის მიხედვით ავტორიზებული 24 უნივერსიტეტიდან GIPA საუკეთესო ხუთეულშია

საქართველოში უმაღლესი განათლების რეფორმის ფარგლებში შემოთავაზებული ავტორიზაციის განახლებული საერთაშორისო სტანდარტებით, რომელიც 2017 წლამდე არსებული სამი სტანდარტის ნაცვლად 7 სტანდარტისა და 19 ქვესტანდარტის დაკმაყოფილებას გულისხმობს, საქართველოში ავტორიზაცია 28 უმაღლესმა საგანმანათლებლო დაწესებულებამ გაიარა. მათგან ავტორიზაცია მიიღო 24–მა უნივერსიტეტმა, მათ შორის საქართველოს საზოგადოებრივ საქმეთა ინსტიტუტმა (GIPA), რომელიც განახლებული საერთაშორისო სტანდარტებით ავტორიზებულ უნივერსიტეტთა ხუთეულშია.

სასწავლო პრაქტიკა თბილისის მერიაში

01 ოქტომბერი

საქართველოს საზოგადოებრივ საქმეთა ინსტიტუტის (GIPA) მმართველობის სკოლასა და ქალაქ თბილისის მუნიციპალიტეტის მერიის გარემოს დაცვის საქალაქო სამსახურს შორის გაფორმებული ურთიერთთანამშრომლობის მემორანდუმის საფუძველზე, ამავე სკოლის გარემოსდაცვითი მენეჯმენტის და პოლიტიკის სამაგისტრო პროგრამის ოთხმა მაღალრეიტინგულმა სტუდენტმა სამთვიანი სასწავლო პრაქტიკა დაიწყო.

სტუდენტებმა პირველი სამუშაო დღე გარემოს დაცვის საქალაქო სამსახურის ხელმძღვანელთან გიგა გიგაშვილთან შეხვედრით დაიწყეს, სადაც პირადად მისგან მოისმინეს საკუთარი მოვალეობები და სამომავლო გეგმები განიხილეს.

GIPA-ს გარემოსდაცვითი მენეჯმენტის და პოლიტიკის სამაგისტრო პროგრამა ასევე აქტიურად თანამშრომლობს საქართველოს პარლამენტის გარემოს დაცვის კომიტეტთან, და უახლოეს მომავალში გეგმავს სტუდენტების მეორე ნაკადის გაშვებას სასწავლო პრაქტიკის გასავლელად.