5-9 ოქტომბერს საქართველოს საზოგადოებრივ საქმეთა ინსტიტუტში (GIPA), Jerusalem College of Engineering (JCE)-თან პარტნიორობით, მონაცემთა ანალიზის თემაზე ერთობლივი საერთაშორისო ვორქშოპი ჩატარდა.
ვორქშოპში GIPA-ს ბიზნესის ადმინისტრირების პროგრამის და Jerusalem College of Engineering-ის ინფორმაციული მენეჯმენტისა და ინჟინერიის პროგრამის სტუდენტები მონაწილეობდნენ.
საერთაშორისო საგანმანათლებლო პროგრამა თეორიულ სწავლებასა და პრაქტიკულ ჯგუფურ მუშაობას აერთიანებს. მონაწილეებმა მონაცემთა ანალიზის თანამედროვე მიდგომებთან ერთად, იმუშავეს LLM/AI ინსტრუმენტებზე, რაც აკადემიური ცოდნის რეალურ მონაცემებთან დაკავშირების ეფექტური საშუალებაა. ვორქშოპის ფარგლებში, ქართველმა და ესრაელელმა სტუდენტებმა ერთიანი ეროვნული გამოცდების შედეგების პროგნოზირების მოდელი ერთობლივად შექმნეს. პროექტისთვის გამოიყენეს ის მონაცემები, რომლებიც GIPA-ს პროფესორ ნიკა აბუაშვილის მიერ იყო შეგროვებული.
ვორქშოპს უძღვებოდნენ JCE-ის წარმომადგენელი დოქტორი ბორის გორელიკი და GIPA-ს პროფესორი ნიკა აბუაშვილი.
პრაქტიკულ პროექტზე მუშაობა სტუდენტებს მონაცემთა დამუშავების, ანალიზის, პროგნოზირებისა და გუნდური მუშაობის უნარების განვითარების შესაძლებლობას აძლევს.
