GIPA-ს აუდიო-ვიზუალური ხელოვნებისა და ციფრული მედიის პროგრამის სტუდენტები ნიდერლანდებში, უტრეხტის გამოყენებითი მეცნიერების უნივერსიტეტში, Erasmus+ Blended Intensive Programme (BIP)-ის ფარგლებში ერთკვირიან საერთაშორისო სასწავლო პროგრამაში მონაწილეობდნენ.
პროგრამის ფარგლებში, GIPA-ს სტუდენტებმა ჰოლანდიელ თანატოლებთან ერთად მოკლემეტრაჟიანი დოკუმენტური ფილმების შექმნაზე იმუშავეს. სტუდენტებმა პრაქტიკაში გაიარეს ფილმის წარმოების სრული პროცესი - იდეის განვითარებიდან, ქალაქის სხვადასხვა უბანში საველე კვლევისა და გადაღებების ეტაპიდან, მონტაჟამდე და დასრულებული ნამუშევრების საჯარო ჩვენებამდე.
აღსანიშნავია, რომ სტუდენტური დოკუმენტური ფილმების ფესტივალის (Campus Doc) არასაკონკურსო სესიაზე GIPA-ს აუდიო-ვიზუალური ხელოვნებისა და ციფრული მედიის პროგრამის სტუდენტის ანასტასია ბახტურიძისა და კურსდამთავრებულის თიკა ხარაიშვილის დოკუმენტური ფილმების ჩვენება გაიმართა. ფილმების ჩვენება გაიმართა უტრეხტის ერთ-ერთ ყველაზე ცნობილ არტ-კინოთეატრში - Art House Theatre Louis Hartlooper.
GIPA ულოცავს სტუდენტებსა და კურსდამთავრებულს საერთაშორისო გამოცდილების მიღებასა და ამ მნიშვნელოვან პროფესიულ წარმატებას!
