GIPA-ს საქართველოში ევროკავშირის დელეგაციის ხელმძღვანელი, ელჩი პაველ ჰერჩინსკი ესტუმრა და უნივერსიტეტის რექტორს, აკადემიურ პერსონალსა და სუდენტებს შეხვდა. შეხვედრას ესწრებოდნენ GIPA-ს ის სტუდენტები, რომლებიც უკვე დაბრუნდნენ წამყვანი ევროპული უნივერსიტეტებიდან; ასევე, ის სტუდენტები, რომლებიც Erasmus+ პროგრამის ფარგლებში შემოდგომის სემესტრისთვის გაემგზავრებიან.
შეხვედრა ყოველწლიური ღონისძიების „ევროპის დღის“ ფარგლებში გაიმართა. ელჩმა საქართველო-ევროკავშირის თანამშრომლობის პროცესსა და არსებულ გამოწვევებზე, საგანმანათლებლო პროგრამების მნიშვნელობასა და ქვეყნის დემოკრატიული განვითარების გზაზე ახალგაზრდების როლზე გაამახვილა ყურადღება. შეხვედრას GIPA-ს პროფესორი მიხეილ დარჩიაშვილი უძღვებოდა.
ხაზგასასმელია, რომ GIPA დაარსების დღიდან აქტიურად ზრუნავს საერთაშორისო პარტნიორებთან თანამშრომლობის გაღრმავებაზე და ახალგაზრდებს მუდმივად სთავაზობს თანამედროვე გაცვლით პროგრამებს. დღეს უნივერსიტეტი 50-ზე მეტ წამყვან ევროპულ უნივერსიტეტთან თანამშრომლობს და სტუდენტებს 80-მდე პროგრამას სთავაზობს.
2018 წლიდან დღემდე GIPA-ს 620-ზე მეტმა სტუდენტმა ისარგებლა საერთაშორისო გაცვლითი პროგრამებით. უნივერსიტეტი მომავალშიც გააგრძელებს ახალი პარტნიორების მოძიებასა და საერთაშორისო პორტფელის გაძლიერებას.
