GIPA-ს წარმომადგენლები Erasmus+ CBHE პროექტის INSPIRE-U ფარგლებში სამუშაო ვიზიტით ბენევენტოში (იტალია) იმყოფებოდნენ. აღნიშნული პროექტის მიზანი უკრაინელი ლტოლვილი ქალებისა და STEM მიმართულებაში ჩაბმული ქალბატონებისთვის მეწარმეობრივი უნარების გაუმჯობესება და მათი ეკონომიკური გაძლიერების ხელშეწყობა გახლავთ.
INSPIRE-U პროექტში (რომელშიც იტალიელი, გერმანელი, შვედი და პოლონელი პარტნიორები მონაწილეობენ ) GIPA-ს აქვს WP5 ლიდერის როლი, რაც ტრენინგების მოდელის, პრაქტიკული აქტივობებისა და გავლენის შეფასების მექანიზმების განვითარებას მოიცავს. პროექტის ფარგლებში მეწარმეობისა და ინოვაციური აზროვნების მიმართულებით 200 ქალბატონის გადამზადებაა დაგეგმილი.
GIPA-ს ბიზნესის ადმინისტრირების საბაკალავრო პროგრამის ხელმძღვანელმა ვანო ცერცვაძემ და ასოცირებულმა პროფესორმა ნიკოლოზ ფარსადანიშვილმა ვიზიტის ფარგლებში სამუშაო შეხვედრები გამართეს პარტნიორი უნივერსიტეტების წარმომადგენლებთან. შეხვედრებზე განიხილეს შემდეგი საკითხები:
- ტრენინგების სტრუქტურა და ხარისხის უზრუნველყოფის მექანიზმები;
- ქალთა გაძლიერების სტრატეგიული მიდგომები;
- პროექტის მდგრადობის უზრუნველყოფა და შედეგების გაზომვა.
ამავე დროს, ვიზიტი მნიშვნელოვანი იყო ახალი აკადემიური და ინსტიტუციური კონტაქტების დამყარების თვალსაზრისით. გარდა INSPIRE-U პროექტისა, შეხვედრებმა ის დამატებითი შესაძლებლობები შექმნა, რომელიც მომავალში სტუდენტურ გაცვლით პროგრამებზე, ერთობლივ ინიციატივებსა და საერთაშორისო თანამშრომლობაზე აისახება.
მსგავს საერთაშორისო პროექტებში მონაწილეობა აძლიერებს GIPA-ს საერთაშორისო პოზიციას და სამომავლო თანამშრომლობის საინტერესო პერსპექტივებს აჩენს.
