პარიზის კათოლიკური უნივერსიტეტი (Catholic University of Paris – ICP) დაარსდა 1875 წელს და წარმოადგენს პრესტიჟულ კერძო, არაკომერციულ უმაღლეს საგანმანათლებლო დაწესებულებას, რომელიც შუა საუკუნეების უნივერსიტეტების აკადემიურ ტრადიციებს ეფუძნება. უნივერსიტეტს კამპუსები აქვს პარიზში, რეიმსსა და რუანში და სტუდენტებს სთავაზობს უნიკალურ საგანმანათლებლო გარემოს, სადაც ისტორიული მემკვიდრეობა, აკადემიური ხარისხი და ინოვაცია ერთმანეთთან ჰარმონიულად არის შერწყმული.
ICP ექვსი ფაკულტეტისგან შედგება და განსაკუთრებულად სპეციალიზებულია ჰუმანიტარულ და სოციალურ მეცნიერებებში. სასწავლო და კვლევითი მიმართულებები მოიცავს ფილოსოფიას, თეოლოგიას, სამართალს, პოლიტიკის მეცნიერებას, ისტორიას, კომუნიკაციას, ენებსა და განათლების მეცნიერებებს.
უნივერსიტეტი ცნობილია ინტერდისციპლინური კვლევებით, რომლებიც თანამედროვე საზოგადოების უმნიშვნელოვანეს გამოწვევებს ეხება, მათ შორის სოციალურ სამართლიანობას, ხელოვნურ ინტელექტს, ციფრულ ტრანსფორმაციას, ჯანდაცვასა და მდგრად განვითარებას.
წამყვან აკადემიურ და პროფესიულ ინსტიტუტებთან თანამშრომლობის საფუძველზე, უნივერსიტეტმა დააფუძნა ინოვაციური კვლევითი კათედრები ისეთ მიმართულებებში, როგორიცაა „ბიზნესი და საერთო კეთილდღეობა“ (Business and the Common Good) და „დიჯიტალიზაცია და მოქალაქეობა“ (Digitalisation and Citizenship). აღნიშნული ინიციატივები ხელს უწყობს აკადემიურ წრეებს, პროფესიონალებსა და სტუდენტებს შორის თანამშრომლობის გაღრმავებას და საზოგადოებრივად მნიშვნელოვანი საკითხების კვლევას.
ურთიერთთანამშრომლობის მემორანდუმსა და სტუდენტთა გაცვლის შესახებ შეთანხმებას ხელი მოეწერა 2026 წლის ივნისში. ზემოაღნიშნული შეთანხმების საფუძველზე, ორ უნივერსიტეტს შორის დაინერგა სტუდენტების გაცვლითი პროგრამა, რომლის ფარგლებში, ყოველწლიურად შესაძლებელია 4-4 სტუდენტის გაგზავნა პარტნიორ უნივერსიტეტში სწავლების სრული სემესტრის გასავლელად.
თანამშრომლობის მიმართულებები: პოლიტიკის მეცნიერება, სოციალური მეცნიერებები.
