ლევან სამადაშვილს საჯარო მმართველობის სფეროში მუშაობის 15 წლიანი გამოცდილება აქვს. სხვადასხვა პერიოდში ის მუშაობდა საქართველოში, უკრაინაში, ყირგიზეთში და ბოსნია-ჰერცეგოვინაში ისეთ საკითხებზე, როგორებიცაა საჯარო სამსახურის რეფორმა, სახელმწიფო სერვისების გაუმჯობესება (მათ შორის, იუსტიციის სახლები და საზოგადოებრივი ცენტრები), ვიზა ლიბერალიზაცია, ელექტრონული მმართველობა და ციფრული ხელმოწერა, ადგილობრივი თვითმმართველობების გაძლიერება და დეცენტრალიზაცია.
2009-2014 წლებში ლევან სამადაშვილს ეკავა პროექტის მენეჯერის, თავმჯდომარის მოადგილისა და თავმჯდომარის პოზიცია სერვისების განვითარების სააგენტოში. შემდეგ წლებში მუშაობდა საჯარო მმართველობის კონსულტანტად საერთაშორისო დონორ ორგანიზაციებში (მათ შორის, გაეროს განვითარების პროგრამა და ეუთო). 2018 წლიდან 2025 წლამდე ის ხელმძღვანელობდა Tetra Tech-ის მიერ განხორციელებულ USAID-ის კარგი მმართველობის პროგრამებს, ხოლო 2025 წლის თებერვლიდან იკავებს სინერჯი ჯგუფის თანადირექტორის პოზიციას.
ლევან სამადაშვილი არის GIPA-ს კურსდამთავრებული, სადაც მრავალი წლის განმავლობაში კითხულობდა სალექციო კურსებს და ატარებდა ტრენინგებს საჯარო მოხელეებისთვის. ის ასევე იკავებდა GIPA-ს ვიცე-რექტორის პოზიციას 2014-2016 წლებში.
